नो ट्याक्स, नो एनसेलः फिर्ता गरियो एनसेलको सिमकार्ड भने पछी ......

इटहरीः कम्पनी किनबेचका क्रममा एनसेलले सरकारलाई राजस्व तिर्न अटेर गरेको भन्दै इटहरीका जागरुक युवाहरुले आफूले प्रयोग गरेका एनसेलका सीमकार्ड बुधबार कम्पनीलाई फिर्ता गरेका छन् ।

 इटहरीको मुख्य चोकमा भेला भएर ‘एनसेल पे योर ट्याक्स, नो ट्याक्स नो एनसेल’ नारा लेखिएका प्ले कार्ड बोकेका युवाहरुले सेन्टरमा पुगेर कम्पनीका अधिकारीहरुलाई सीम फिर्ता गरेका हुन् । उक्त अभियानमा सहभागी प्रा.डा. टंकप्रसाद न्यौपानेले जिम्मेवार निकायले राजस्व नतिर्नु लज्जास्पद भएको बताए ।

 राज्यका नागरिकले कुनै न कुनै तरिकाले राज्यलाई कर तिरेको भन्दै अर्बौँ नाफा भएको विदेशी कम्पनीले राज्यलाई कर नतिर्नु गैरजिम्मेवारीपनको नमूना भएको कार्यक्रमका सहभागीको भनाइ थियो । राज्य सञ्चालनमा रहेका जिम्मेवार व्यक्तिले कम्पनीलाई करको दायरामा ल्याउन नसक्नु विडम्वना रहेको उनीहरुले बताए ।

 त्यस्तै अभियानमा सहभागी अर्र्का अभियानकर्मी हिरा आचार्यले एनसेलको सेवा राम्रो भए पनि राज्यप्रतिको दायित्वबाट भाग्न खोज्नु नियमसंगत नभएको बताए । उनीहरुले आफ्नो अभियानलाई जारी राख्ने भन्दै एनसेलले राज्यलाई कर नतिरेसम्म आफ्नो दबाबमुलक कार्यक्रम नरोकिने बताएका छन् ।