बन्दकर्ताद्वारा विहानै काठमाडौंको कोटेश्वरमा चालकसहितको ट्याक्सीमा आगजनी

फाइल फोटो काठमाडौं, २७ जेठ - बन्दकर्ताले काठमाडौंको कोटेश्वरमा चालकसहितको ट्याक्सीमा आगजनी गरेका छन्। बिहीबार बिहान कोटेश्वरमा दुई जना बन्दकर्ताले बा १ ज ८२०६ नम्बरको ट्याक्सीमा चालक भित्रै रहेका बेला आगजनी गरेको प्रहरीले जनाएको छ। कलंकी जान भन्दै आएका दुई जनामध्ये एक जनाले चालकसँग बार्गेनिङ गरेको र अर्का एक जनाले पेट्रोल खनाएर आगो लगाएको प्रहरी निरीक्षक अजय जोशीले जानकारी दिए।

उनका अनुसार उनीहरुले एक लिटर पेट्रोल ल्याएकोमा ८ सय एमएल ट्याक्सीमा खन्याएका थिए। आगो लाग्न थालेपछि चालकले भागेको उनले बताए। आगजनी गर्ने दुई जनाको खोजी भइरहेको प्रहरीले जनाएको छ। आगजनीका कारण ट्याक्सीमा आशिंक क्षती पुगेको छ। चालक मकवानपुरका २४ वर्षका सुवास परियार सुरक्षित रहेको प्रहरी निरीक्षक जोशीले बताए। नेत्रविक्रम चन्द विप्लव नेतृत्वको माओवादीले गरेको बन्दका कारण भाडाका गाडी कम चलेका छन्। तर निजी गाडी भने नियमित रुपमा चलेको ट्राफिक प्रहरीले जनाएको छ।